Warp Bortz

zientzia besapetik pasatzen duten zi-fi filmak

2012-01-25T20:38:00.000+01:00

Hiru gauza dira nahitaezkoak zientzia fikziozko film bat egiteko. Lehenengoa eta garrantzitsuena ordenagailuak silikonaz eginak izatea da, nonbait etorkizuneko informatika biguna eta malgua izango baita. Fundamentuzko zi-fi filma egiteko bigarren legea nola edo hala Jainkoa sartzea da. Jainkoa eta zientzia, denok dakigunez, guztiz bateragarriak baitira. Hirugarren eta azken araua, eta honoetaz asko daki Brucek, grabitate indarra besapetik pasatzea da.

Bruceren potroei bost axola zaizkie fisikaren legeak

Badaude halere egin daitezkeen beste hainbat hanka-sartze eta i09-koek zerrenda osatu dute akats ohikoenekin.

Klikatu handitzeko

Zerrenda kritikagarria bada ere (batez ere espazioan hiltzeko moduari dagokionean), onartu egingo dugu eta film bat gehituko diogu. Izan ere 2001: Espazioko Odisea maisu lanaren jarraipena den 2010 filmean ez zuten beharrezkoa ikusi grabitatearen edo hobe esanda, haren gabeziari, garrantzia ematea. Gainontzekoan film aparta dena kakazteko modurik merkeena.

Zein gehituko zenuke zuk? Eta zergatik?

Iturria: i09.com

QBO-ren autokontzientzia

2012-01-16T18:40:00.000+01:00

Iritsi da hainbeste mendetan gizakiak amestu eta baita "amesgaiztotu" duen unea. Aurrerantzean robotak ez dira jostailu garesti soilak izango baizik eta bere buruaz kontzientzia duten adimen mota berri bat. Agurtu dezagun, bada, QBO:

Kontzientzia horren benetakotasunaren eztabaida esparru filosofikoari dagokion heinean hobe afalondo baterako uztea (batez ere orain txotx denboraldia hasi berri dela), baina esan beharra dut, Turing-en testaren ikuspegitik (eta nik pertsonalki Captchekin ditudan arazoak ikusita), niri dagokionez QBO izaki adimentsu bat dela. Zer uste duzu zuk?

Bonus point: QBO kode irekia omen da gainera, zu eta ni ez bezala. Zer gehiago eska dakioke?

Iturria: Robotica Street 1 eta 2, The Corpora (QBO-ren sortzaileak).

BSG RPG

2012-01-12T17:55:00.000+01:00

Lagun batzuek Battlestar Galactica-ren berrikuspena laburbildu digute RPG moduan, lau sasoi ikusteko pazientziarik eta bideoaren izenburua baino luzeago den ezer irakurtzeko gogorik ez dugunontzat. Eta egia esanda emaitza aparta da, bideoa ikusita bere garaian aintzat hartu ez nituen hainbat gauzez ohartu bainaiz. Batez ere guztiz ahaztuta nuen bukaerako buruzagi hori.

Iturria: Topless Robot.

Dabirint

2012-01-07T16:15:00.001+01:00

Euskaltzainak goblindarren leinutik urrun ez zebiltzala bagenusten ondorengo bideoak zalantza guztiak duxatza. Dakusazue, esandakoaren erakusle, jarraian neba negartiaz libratzeko goblindarrek darabilten aditz-egitura jatorra:

Errepika: "Nahiago nuke goblindarrek bazinderamakete".

Ori orrela da.

Iturriak: Laberintua, Euskal Encodings.

2012. urteak ekarriko (ez) diguna

2012-01-02T15:33:00.001+01:00

Ideiarik ez 2012. urte honek ekarriko digunaren inguruan. Etxerako androideak, lanera joateko JetPack-ak eta Marteko kolonizazioa oraingoz baztertu ditzakegula argi asko dago, eta baita Time aldizkari famatuak 2010. urtean ateratako berri hau ere:

Batez ere irudian agertzen direnak Arthur C. Clarke eta Stanley Kubrik direlako eta Time aldizkariaren alea 2010 filmeko keinu zoragarri bat delako.

EGUBER-HIL ON!

2011-12-23T15:04:00.000+01:00

Gaur gauean pozez zoratzen irtengo dira Euskal Herriko™ haurrak eta gurasoak Olentzero analogiko eta wetwarikoari ongietorria ematera, gaztainak jan, salda beroa edan eta zintzurrak berotzera. Gizajoek ordea ez dakite aurtengoa Robolentzeroren urtea dela eta kalean topatzen dituen guztiak akatuko dituela segituan, herio&suntsipena denen artean banatuz.

Eguber-hil on guztioi!

Miyamotoren Aingeruak

2011-12-15T19:54:00.000+01:00

Hartu Samus Aran, Zelda eta Mertxika Printzesa bana, konbinatu Txarliren Aingeruen neurri batekin eta gehitu interaktibotasun apur bat. Lixto, hortxe duzu burmuina leherraraziko dizun frikiziyoaren molotov koktela.

Hauxe da bizitzaren gatza&piperra.

Iturria: Azken aldian frikitasunaren Nirvanara iritsi den Topless Robot.

Enterprise D-ren giro-soinua

2011-12-14T21:04:00.000+01:00

Zer oroitzapenak dakarzkidan bideo honek! Q dimentsioz gaindiko izakiak, klingonak izar flotan eta androide sasi-umoretsuak, kapitain burusoil eta umore-gabeak eta ahalmen psikikoak dituzten betazoideak zubian. Zenbat gau eta zenbat egun warp 5-eko gurutzaldi-abiaduran, une oro eta toki oro warp motorren zarata isila lagun.

Martxan jarri, bada, ondoko bideoa eta gozatu 1.5 orduz (24 orduko bertsioa ere badago) Enterprise D espazio-ontziko hondo-soinuaz.

Nik jada mp3 moduan jaitsi eta trikorderran sartu dut, edonon nagoela entzun eta etxean bezala sentitzeko. Zeren zain zaude?

Iturria: Microsiervos.

McFly-ren mag-patina mundu errealean

2011-12-07T08:07:00.000+01:00

MagSurf du izena eta ikusi ahal duzuenez teknologia ikaragarri garatua dago dagoeneko, edozein momentutan salgai jartzeko moduan. Magsurf bakoitza 50 litroko nitrogeno likido txanbila batekin etorriko da, behin bukatutakoan edozein litxarreria-dendatan bete ahal izango dena. Enpin, Gabon hauetan orain arte hain modan zeuden Street Surf monopatinak ordeztuko dituela fijo.

OHARRAK:

+MagSurf honek eskaintzen duen esperientzia osoaz gozatzeko Nike Mag -ak gomendatzen dira.

+MagSurf garatzen duen enpresak ez du inongo ardurarik onartzen nitrogeno likidoaren erabilerak haurrengan sor ditzakeen hanketako erredurak zein anputazioak edo oxigenoaren desplazamenduaren ondorioz eman daitezkeen itolarriak.

Gehigarria: MagSurfa-ren masa ekoizpenaren bideoa

Schwarzenegger is... The Narrator!

2011-12-05T21:50:00.001+01:00

Hau ikusi ondoren erraz asko uler daiteke nola iritsi zen Terminator puska hau Kaliforniako txerifa izatera. Hori da hitz jarioa, hori da adierazkortasuna, hori gatza&piperra!

Ikusi duzuen bideoa Total Recall DVD-ko audio-iruzkinak dira eta DVD hori hain da awesometsua® nire hirugarren giltzurruna segituan emango nukeela eskuratzearren.

Iturria: Zona Fandom.

Liburu aukeratzaile analogikoa

2011-11-30T19:53:00.000+01:00

Ez aspaldi zientzia fikzio zein fantasiazko telesaila aukeratzeko diagrama ekarri genuen Warp to the Bortz-era eta gaurkoan, gure frikintelektualtasunaren seinale, liburuena dakarkigu.

Eta honekin arazoa sortu zaigu. Eta latza gainera. Izan ere bideojokoen eta telesailen prokrastinazioarekin nahikoa ez bagenu, orain hamaika liburu izango ditugu irakurgailuan, denak aldi berean irakur ditzagun eskatzen. Tira, Satan Txikiren biderkatze teknika ikasi beharko dut.

Oharra!: Diagrama hau ere simaurraz beteta dago. Gaurko honetan ez dut lan zikina egingo eta zuei utziko dizkizuet garbitze lanak. Ezkerrakeko negligentzia neurologikoa duzuenok behintzat ez duzue lan handirik izango.

Iturria: SF Signal, Mundo Geek.

Sekulako asmakuntza: Komiki azal bizidunak

2011-11-24T17:45:00.001+01:00

Ez dut ulertzen nola ez zaidan niri bururatu, aritmetika hutsa baita: komikiak + gif bizidunak = GARAIPENA™

Portzierto, alderdi politiko batekoa bazara bidalidazu mezu pribatua eta hurrengo hauteskundeetan GARAIPEN™ basatia ekarriko dizun kanpaina-bizidun batentzako proposamena eztabaida dezakegu.

Iturria: Albotas.

APOD: Alegiazko Picture of the Day #2001

2011-11-17T08:00:00.000+01:00

egin klik handitzeko

Azalpena: Jupiterrekin egin zuten eta orain gure eguzkiarekin ere. Plan Handiak gure eguzkia zulo-beltza bilakatzea eskatzen du eta hala eginen dute. Gizakiok atzeman ezinezko helburua ulertu ezin dugun moduan nola garatzen den ikusiko dugu milioika urteetan zehar. Bitartean aukera bakarra izango dugu, ikuskizunaz gozatu. Handia izanen baita, zinez. Eta ondoren amets egin. Amets egingo dugu?

Iturria: NASA-ren APOD, benetakoa.

APOD: Alegiazko Picture of the Day #3

2011-11-16T08:00:00.000+01:00

klikatu handitzeko, ausardia baduzu!

Azalpena: Hori ez da eguzki-orbana. Goiko irudiaren ezker-behealdean ikusten dena Herioaren Izarra da. Ehunka mende iraun duen errepublikak nagikeria eta ustelkeria zulo bat bihurtu da, galaxiako biztanleek dituzten benetako beharrei eta printzipioei erantzuna emateko gaitasunik ez duena. Palpatine senadoreak Darth Vader lagun duela eta Herioaren Izarra bezalako asmakuntzei esker txakur-txirula errepublika-zale, printzesa-maitale eta erlijio zaharkituen jarraitzaileak behin betiko garbituko ditu urrutiko galaxia honetatik.

Iturria: NASA-ren APOD, benetakoa.

APOD: Alegiazko Picture of the Day #2

2011-11-15T08:00:00.000+01:00

klikatu hemen xehetasunak ikusteko

Azalpena: Hori ez da eguzki-orbana. Goiko irudian, eguzkiaren eskuin aldean ageri dena Cylon talde bat da, Izarbase eta Raiderrez osatuta. Hogei Koloniek azken hamarkadetako garapen eta bakearen ondorioz garai batean izandako printzipio guztiak galdu egin ditu, Koboleko jainko paganoak gurtuz. Orain, jatorrizko Jaungoiko Bakarraren nahiari jarraikiz Cylonak iritsi zaizkigu, sorkuntzari duintasuna ekarriko dion garbiketari ekiteko.

So say we all.

Iturria: NASA-ren APOD, benetakoa.

APOD: Alegiazko Picture of the Day #1

2011-11-14T08:00:00.000+01:00

klikatu irudian handitzeko

Azalpena: Hori ez da eguzki-orbana. Goiko irudiaren ezker-behealdean ikusten den itzala USS-Enterprise D espazio-ontzia da, Federazioa eta Romuldar Inperioaren arteko bakea sinatzea helburu duen misioa hastear dagoela. Denbora luzea darama Federazioak azken aldiko liskarrak behin betiko bukatuko dituen tratatua Romuldarrekin eztabaidatzen, Spock buru duen sektore honetako diplomazialari talde onenaren laguntzaz.

One to beam up. Energize.

Iturria: NASA-ren APOD, benetakoa.

Zorionak zure urtebetetzean, zorionak ta urte askotarako...

2011-11-09T20:21:00.000+01:00

Zorionak zure urtebetetzean
Zorionak, ta urte askotarako
Zorionak belarritik tiratzean
Zorionak ta musu bat zuretzako

Zorionak, Sagan jauna.

Marteko roberren soinua

2011-11-02T22:23:00.001+01:00

Inoiz imajinatu duzu zer entzungo zenukeen Spirit edo Opportunity erroberra bazina? Ba segi imajinatzen ze galdera horren erantzuna ez duzu hemen aurkituko.

Izan ere roberrek ez dute mikrofonorik eta ondorioz ezin dute soinurik grabatu. Baina bai badituztela lurreko irregulartasunak detektatzen dituzten azelerometroak eta azelerometro hauen datuak soinu bihurtu daitezke. Emaitza ez da bereziki deigarria berez, baina niri behintzat Marten dagoen robot batek erregistratua izan dela pentsatzeak zirrara sortzen dit. Igo bolumena eta zabaldu belarriak:

Spirit

Opportunity

Informazio gehiago: NASAren webgunean eta podkastean.

The Greatest American Heroine

2011-11-01T20:30:00.001+01:00

Izenburua ongi idatzita dago bai. Ez dakit Espainian aireratu ote zen, baina behin The Greatest American Hero telesaila bukatuta jatorrizko aktoreak berriz ere bildu ei ziren gure Ralph Hinkleyren (ala Hanley?) oinordekoa izango zenaren atal-pilotua grabatzeko.

Pilotu honetan urte batzuk igaro dira jatorrizko saileko azken ataletik eta txiripa hutsaz gure heroi handiena famatu egin zaigu. Ralph ederki baino hobeto moldatzen da bere estatus berrira eta hori ez zaie batere gustatzen jantzia eman zioten estralurtarrei. Hau dela eta jantzia kendu eta bere ondorengoa bilatzea ematen diote azken misiotzat. Esan eta egin, Ralphek Holly Hattaway, haur hezkuntzako irakasle, ekologista eta harrera-ama (errubia, guapua eta sinpatika askua gainera) aukeratuko du. Eta hortxe hasten da abentura...

Baina zorionez edo zoritxarrez abentura motz geratu zen, pilotuaz gain ez baitzuten atal gehiago ekoiztu. Beraz bitxikeria bezala geratu zaigu Amerikako Neska-heroirik handienaren lehengo eta azken atal hau. Gozatu:

Eta Amerikako Heroi Handienaren abentura gehiago ikusteko gogoz geratu bazarete, jatorrizko sailaz gain web-telesail berria eta komikia dituzue. A zer betekada!

begien goxatzeko

2011-11-01T10:11:00.000+01:00

... eta kamiseten eiteko, zergatik ez ;)

Iturria: It's Full of Stars & The Dark Side of the Force.

zonbi eder bat nola bilakatu

2011-10-23T23:25:00.000+02:00

Oroitzen The Walking Dead-eko zonbi earrena? Telesaila estrenatu zenean telebista, aldizkari eta webgune guztietan agertu zena eta gure txerifak errukiz hil zuena? Ba bigarren denboraldia estreinatu baino lehen (lehenengo bi atalak jada agertu diraa AEB-etako telebistan eta seriesyonkis webgunean ) eta hype-a pizteko (bai eta frikion gozamenerako) sei web-atal plazaratu zituzten.

Bost bat minutuko ataletan zehar gure zonbi eder haren jatorria azaltzen zaigu. Ezer berezirik ez duzu topatuko, ezohiko ezustekorik ez duzu izango, baina zaude ziur, zonbi-zale zaren hori, lehenengo denboraldia berrikusteko grina piztuko dizula hozkadatik zonbi bihurtzera dagoen tartea baino denbora laburragoan.

A New Day

Family Matters

Domestic Violence

Neighborly Advice

Step-Mother

Everything Dies

Portzierto, badirudi nahiko ongi hasi dela bigarren denboraldi hau. Ea lehenengoaren bukaeran hartu zuten norabide Lost-iar hori zuzentzen duten.

Iturria: Zona Fandom, Alt1040.

Three years ago they came

2011-10-12T11:33:00.000+02:00

Three years ago they came,
forewer altering the future
of humanity.

Nin x Nin: Ninja Hattori-kun

2011-10-06T21:09:00.001+02:00

Hattori Ninja marrazi bizidunen sarrerako bideoa jarri nahi nizuen (Kanzo Hattoriren fan eta ikaslea naiz) baina Youtubera igo bezain laster patenteen arazoak direla eta ezabatu egin didate, horrela jarraitu ezkero sei hatz lodiak moztuko dizkidatenaren mehatxupean gainera. Hiru hatz lodiekin ezer gutxi naizela jakinda, men egin eta hatz lodien beharrik ez duen norbaitek ia bideoa zintzilikatu duen bilatzen egon naiz eta baita zerbait mamitsua aurkitu ere.

Hattori ohetik jaiki berria

Dragoi Bolaren hezur-haragizko filma egiteko zenbait ekoizlek dituzten potroak ikusita ez nau aurkitutakoak batere arritu. Izan ere, bai, asmatu duzu, mundu zabalean bada benetako aktore analogikoekin egindako Hattori Ninjaren filma. Eta kontzeptua bera bezain kutrea dirudi gainera. Hona trailerra:

Filma ikusten atrebitzen bazarete abisatu, guztiz katatonikoak geratzen bazarete zuen bila joateko.

Nin-nin.

meme troiarra

2011-09-30T16:50:00.001+02:00

Hau ikustean ez nekien zer egin, zuzenean tuiteatu ala jokabide guztiz neurekoian Warp to the Bortzen jarri, bisita mordoa izan eta blogak emandako dirutzatik bizi. Eta noski, bigarren hau erakargarriagoa izanik plana aurrera eramateari ekin diot.
Hemen duzue beraz zuen galbiderako eta nire aberasterako atea. Behin irudiak esaten duena eginda meme-troiano batek zuen garunak kutsatuko ditu eta gauero gauero zonbi bezala jaiki eta transferentzia potolo bat egingo didazue Cucha-Bank edo Caja Sevilla-ren bitartez. Oraindik ausartzen zarete? Aurrera ba eta mila esker.

Pixka bat pentsatu ezkero konturatu naiz nire plan borobila ez dela hain borobila azken finean (elipsea akaso?). Izan ere nik ere egin dut irudiak esandakoa. Zer esan nahi du horrek orduan, ni ere kutsatua izan naizela? Goian idatzi dudan guztia psiko-troiar batek bultzatua idatzi dudala eta nire gogoa esperimentu txinatar sekretu baten menpe dagoela? Zorabiatzen hasi naiz.......

Iturria: Paraiso Friki.

Duke Neskak edo zergatik den Duke Nukem putoamoa

2011-09-27T19:05:00.000+02:00

Lehenik eta behin esan beharra daukat gaurkoaren ondorio etikoen inguruan ez nagoela batere ziur. Beraz, baten bat irainduta sentitzen bada ez diezadala niri ardurarik eskatu. Ardura guztiak Duke Nukem-enak dira eta arazorik bazenu hobe zenuke berarekin argitu, beti ere benetako GIZONek arazoak konpontzen dituzten moduan, hau da, OSTIAka. Bai, hizki larriez gainera.

Aspaldi dakizue Duke Nukem sakonki miresten dudala, baina hau ikusi ondoren zuzenean Dukea nire Jaungoikoa bihurtu da, bere harropuzkeria eta potroen graziagatik. Nor bestela ausartuko zen egungo moral bikoitzeko gizarte puritano honetan bere joko berria zabaltzeko neskak biluztea helburu duen nabigatzailearentzako jokotxo bat ateratzen? Pues hori. Jokatu nahi duenarentzako segi Duke-Nudem webgunera. Eta zuzenean argazkiak ikusi nahi dituenarentzako zuzen Wildgames-era.

Guzti hau eta gehiago Pixfans-en.

Oharra: Bai, baten bat ohartuko zen hau nahiko zaharrunoa dela (maiatzekoa gutxienez), baina inork ez du esan hau berrien bloga bat denik. Warp to the Past-en zaude, lagun!

destrukzio kosmikoko arma definitiboa

2011-09-26T08:03:00.000+02:00

FPS bideojokoen munduan badaude existitu behar ez zuketen armak. Arma suntsitzaileak dira, geldiezinak, eskuratzen dituen orori bidegabeko abantaila ematen diena gainontzekoen aurrean. Horrelako tramankulu definitiboen erabilera mugatu egiten bada ere beti dago arduragabeko modlariren bat FPS-etako armen oreka jainkotiarra hautsi nahian dabilena.

eta zeinen gustura geratzen zinen motozerra erabili ondoren

Aspaldi Nevergonnagiveyouup weapona ekarri genizuen Warp to the Bortzera. Hura suntsitzailea zen oso, baina baita erritmo eta klase handikoa ere. Aldiz, gaurkoan dakarkigunaren gupidagabeko boterearen arriskua hain da mugagabea ezen gizateriaren gogotik ezabatu beharko litzateke oraintxe bertan etorkizunik izango badugu. Pues hori.

Informazio gehiago: Abadia Digital.

Amodio eta gorrotozko kanta (eta tarta ere bai)

2011-09-20T18:27:00.000+02:00

Batzuetan, gutxitan bada ere, arteak, entretenimenduak, originaltasunak eta amodioak bat egiten dute Portal bezalako bitxiaren itxura hartuaz. Pena gaur egungo bideojokoen ildoa jarraituz hain laburra izatea. Hemen amaierako kredituetako kanta. Maitasuna 100% ean.

Portzierto, gaur arte dohain duzue Portal bideojokoa Steam-en bidez. Aprobetxau!

Eta portzierto #2: Bai, lehenengo Portal-i buruz ari naiz. Bost urte barru edo (eta lehenengoak bezala maitemintzen banau) joko puska hori mugitzeko ordenagailua dudanean ekarriko dugu Warp Zaharruno honetara.

BONUS: Aurreko abestiaren bertsio 8-biteroa. Maitagarria 8-bitetan.

❤❤❤❤❤❤❤❤❤❤❤❤❤❤❤❤

Nik ere nahi dut!... Klingonera ikasi

2011-09-16T11:23:00.001+02:00

Frantsesa ikasi beharko nuke Iparraldera noan bakoitzean euskaraz hitz egiten saiatu eta otordua gazteleraz eskatzen ez bukatzeko, edo txinera agian, nire kurrikuluma norbaitentzako erakargarria izan dadin behingoz. Baina ez, klingonera ikasiko dut, nahi dudalako eta orain ahal dudalako, Start Trek: Infinite Space bideojokoa aditzera emateko antolatu duten atalkako ikastaroari esker.

hemen An'Dhoni gudari-irakasle ohoretsua

Bederatzigarren ataletik dabiltza honezkero, baina denetan erabilgarrienak seigarrena, saiakeran hil gabe emakume klingondarrekin ligatzearena, eta zazpigarrena, aurrekoan kale eginez gero biraoak behar bezala botatzen ikasteko. Hemen duzue, sarrera moduan, lehenengo atala: nuqneH eta Qaplá

Eta ez pentsa klingonera ikastea ezertarako balio ez duenik, izan ere gizateria Klingon Inperio handiari libreki anexionatuko zaion unea hurbil dago eta.

Qaplá

ESTRALURTARREK SORTUTAKO IZARRA AURKITUTA

2011-09-07T21:40:00.002+02:00

Zientzilariek aurkitutako izar hau Lurraz kanpoko bizi forma adimentsuak existitzen direnaren froga errefusa-ezina da. Zergatik diodan hau? Azalpena irudiaren ondoren.

estralurtarren lana, fijo baietz

>Mode txapa = ON

Izarrak hidrogenotik abiatuz elementu astunagoak sortzen dituzten fusio erreaktoreak dira oinarrian, hidrogenoa lehengai bezala erabiliz helioa eta kantitate txikiagotan gainontzeko elementu astunagoak sortuz. Izar horiek agortzerakoan espaziora askatutako elementuek sortuko dituzte ondorengo belaunaldiko izarrak. Honela, belaunaldiak joan ahala izarrak elementu astunagoetan aberastuz joango dira.

Gure eguzkiaren belaunaldiko izarrak erlatiboki aberatsak dira elementu astunetan eta proportzio hori jakina da gainera. Gertatzen dena da SDSS J102915+172927 izarrak elementu astunen oso proportzio baxua duela eta horrelako proportzioak izan zituzten izarrak aspaldi agortu zirenez izarraren esistentzia bera ezin azaldu dabiltza zientzialariak.

>Mode txapa = OFF

>Mode ze-listoa-naizen = ON

Meritokrazia zurrun eta zorrotz batean hezi izan diren zientzialariak ez dira gai gu, zientzia-fikzio eta fantasiazko filme/telesail/liburu/komiki/jokoek behin betiko izorratutako garunen jabeok hain argi ikusten duguna: Era naturalean existitzerik ez duen izar hau eoietan zehar garatutako gizarte estralurtar hiper-garatu baten lanaren ondorioa dela, energia iturri bezala erabiliko dituen izarrak espazioko hidrogeno eta helioa bilduz sortzen dituena. Tapunto.

>Mode ze-listoa-naizen =OFF

Protoss-ak dira guzti honen atzean daudenak?

Eta guzti hau niri bakarrik bururatu zait, gaurko APOD irudia oinarritzat hartuta. Hurrengo batean Maiorga Ramirez - estralurtarrak konspirazioa eta aluminioz estalitako txapelena azalduko dizuet.

17 Hiritik Ihesi Part Two

2011-09-04T23:12:00.000+02:00

2009. urtean plazaratu zuten Scape from City 17, Half Life 2-ko unibertsoan oinarritutako laburmetrai indie-aren lehenengo atala. Ordutik hona denetarik gertatu da munduan, Beyond Black Mesa-ren lehenengo eta blogan jarri ez genuen bigarren atalak (azkenean nahiko truñoa suertatu zena), Half Life-ko laburmetraien ama den Half Life: Singularity Collapse edo Bruce Wayne-k pinguinoa osorik jan zuenekoa adibidez.

Orain, Scape from City 17 horren bigarren atala iritsi zaigu azkenean. Ondo egina dago, luzea da eta Half Life-n oinarrituta dago, baina hasierako freskotasuna eta berritasuna guztiz galdu ditu eta Hannibal Smith-ek zioen bezala Ustekabe Faktorea® hil ala bizikoa da beti.

G-Man ikusi duzue?

Iturria: Frikicetia.

Picard-ek Warp 5 maite du

2011-09-02T08:34:00.001+02:00

Esker aunitz Picard kapitaina eta tripulazioa. Zinez esker aunitz.

"Esta casa ya está limpia"

2011-08-31T16:43:00.001+02:00

Ziur zaude Tangina? Ziur zaude?

Ideia ona kamiseta batentzako. Auzoko frikia izateaz gain izpiritu zitalen aurrean babestuta egongo zinateke. Pagotxa haisue!

puntutxo urdin zurbila

2011-07-29T16:49:00.000+02:00

Espazio-anezken programa bertan-behera geratu dela alde batetik eta gaur erromantiko samar esnatu naizela bestetik, zeharo unkitu nau Carl Sagan, inoizko dibulgatzailerik onenaren eta eliax-en ikusitako bideo hau:

Asteburu luze eta oparoa izan dezazuela.

Transbordadoreen hasiera eta bukaera

2011-07-26T16:04:00.000+02:00

Honela hasi zen espazio-anezken historia:

Enterprise, lehenengo Mundu Errealeko espazio-ontziaren aurkezpena

Eta honela bukatu, Star Trek: Voyager telesailaren musikarekin:

Eta orain inoiz baino hurbilago daukagu "azkenengo muga" hori eta urrutiago bizi-forma eta zibilizazio berrien aurkikuntza.

Eta ez, Voyager anezkaren aurkezpenean ez da Kirk ageri, argazkiaren unean (eta aurkezpen osoan ere) azafata baten atzetik baitzebilen.

Iturriak: Mundo Star Trek, The Atlantic.

Leia-esklabuaren sindromea

2011-07-20T16:49:00.007+02:00

Nori ez zaio noiz edo noiz gertatu friki-festa batetara joan eta inguruko guztiak zure Leia-esklabuaren mozorro bera eramatea? Ba ondoko bideoan "Leia-esklabuaren sindrome" deritzon honentzako irtenbideak aurkeztuko zaizkigu. ~~Harrigarria bada ere bestelako mozorroak posible dira~~ esan behar nuen, baina harrigarriena horrelako festak esistitzea da ;)

Zein mozorro aukeratuko zenukete, neskak?

Half Life: Singularity Colapse-k petatzen du

2011-07-19T16:40:00.000+02:00

Half Life 2ren unibertsoan oinarritutako laburmetraia hau awesomitate hutsa da %100ean edo gehiago eta haren egileak putoamoak dira eta kitto. Eta aurkakoa esaten duena Crepusculo-zale zikin bat besterik ez da.

Oraindik ez zaizkit hotzikarak joan.

Iturria: Akihabara Blues.

musika errepikakorra II: Starcraft

2011-07-10T18:17:00.002+02:00

Zaharrunoa, retroa, abandon-zalea deitu ahal didazue nahi izanez gero, baina gauza da netbookean instalatzeko jokoren baten bila nenbilela Starcraft-ekin egin dudala topo eta berriro jokatzeari ekin diot.

Eta berriz ere aspaldiko musika errepikakorra bezain sarkorrarekin topatu naiz, jokatzen zein San Fermineko txarangen atzetik nabilela etengabe garunean jo ta su dabilkidana, nire Pentium garaiko CPU-aren baliabideak xurgatuz. Baina zer demontre, horretarako jaio gara frikiak!

Eta bukatzeko hemen duzue abesti bera, baina oraingo honetan musika banda batek jota, erdipurdi bada ere, zuzen-zuzenean.

Ea noiz animatzen den txarangaren bat, elektrotxarangak egin zuen antzera, gure herrietako jaiak alaitzen eta frikitzen. Gora jai herrikoi&frikiak!

Van Freeman-en autorretratua

2011-06-29T23:31:00.001+02:00

Van Gogh-en autorretratua Erresonatzia Magnetiko Nuklearrarekin aztertzerakoan hauxe da jatorrizko margolanaren azpian zientzialariek topatu dutena. Izan ere gure Van Gogh biziatu hutsa zen (horregatik hain zuzen ere PlayStation sarea aste oso batez erorita egon ondoren moztu zuen belarria).

Esnatu Mr. Freeman!

Beyond Black Mesa, Half Life 2-ko laburmetrai independientearen Facebook-eko orrian ikusia.

Zenbat molatzen duen Spider-Man-en musikala! Baina ez.

2011-06-27T21:15:00.000+02:00

Musikalaren lehenengo atal hau ikusita eskertuko nuke bigarren atalean benetako Venom bat agertuko balitz aktore eta ikuslegoaren garunak xurgatzeko eta gero Green Goblin-a, kalabaza bonben bidez garunik gabeko gorputzak behin betiko desintegratzeko. Ondoren Mefisto-k musikal honen oroitzapenak bideo hau ikusi duten guztien garunetik ezabatuko lituzke, bide batez egondako ezkontza guztiak eta izandako seme-alaba guztiak desagerraraziz, zeren horretan datza gidoi awesome baten sekretu bakarra.

Portzierto, bideoaren bukaeran (iristeko potroak badituzue) hurrengo atala ikusteko aukera izanen duzue. Egin klik estekan eta Matrix kolgatu egingo da.

Iturria: Topless Robot.

kaloriak ninjatzen

2011-06-23T18:37:00.000+02:00

Uda iritsi zaigu eta gu hemen, patata frijituak esku batean, Naparbier garagardoa bestean eta kontsolako mandoa bestean. Japonen ostera badute jokabide auto-suntsitzaile honetarako konponbidea. Kalorien Ninjak dira eta Hatori bezala hamaika trikimailu darabilte kiloak irabazteko duzun joerari aurre egiteko. Horretarako katana erabili behar badute ere.

Portzierto, bideoa egin duten morroiak ninjakeriez betetako kanala du Youtuben.

On egin!

Tai-Chi Vader

2011-06-21T23:23:00.000+02:00

Ingurukoak urrutitik itotzeaz gain hau da Darth Vader-ek gehien maite duen denbora-pasa. Hau eta diskoan desfasatzea, baina bigarrengo honen irudiak plazaratzen saiatu diren guztiak karbonitan sartuta bukatu dute.

Non ikusia: Paraiso Friki.

Metal Totoro

2011-06-17T14:56:00.000+02:00

Japoniarrak putoamoak dira (zentral nuklearrekin izan ezik) eta ospeari eusteko oraingoan Ghibli estudioetako filmetako hainbat abestiren metal bertsioak grabatu eta salgai jarri dituzte. Erosi ez ditut erosiko, baina bai entzungo ditudala, gustora gainera. Hemen duzuena Totoro Auzokidearen bertsioa da. Ikaragarria.

Eta gainontzekoak entzun nahi badituzue, muxutruk, hemen duzue youtube-ko erreprodukzio zerrenda. Ou yeah!

Portziero, diskaren izena "Princess Ghibli" da. Asteburu ona izan!

Iturria: Zona Fandom.

Link <== to the Future

2011-06-16T23:14:00.000+02:00

Zer gertatzen da Zelda eta Back <== to the Future unibertsoak megakrosober batean elkartzen ditugunean? Ba indar nuklear indartsua zeinuz aldatu eta materia guztia segituan desegiiten dela. Edo ez. Edonola ere, hemen bideoa:

Handia naizenean Doc bezala izan nahi dut. Ikaragarri molatzen du.

Nondik fusilatua: GeekStir.

Makilakixki en la Pequeña China

2011-06-09T23:53:00.000+02:00

gezurra badirudi ere, jatorrizkoa hobetu daiteke

Filmetako kartelak ez dira lehengo filmetako kartelak. Badakit, olatuak ez dira lehengo olatuak, neguak ez dira lehengo neguak eta eguneko 24 orduak ez dira lehengo eguneko 38 orduak, baina gauza da oraingo filmetako kartelak ez direla lehengoak bezain onak. Eta puntopelota.

ze planta, ze itxura, ze saturazioa!

Eta gaur egungo filmak ez dira lehengoak bezain onak, baina tesi horren garapena hurrengo disertazio baterako utziko dugu.

Zi-Fi telesailen organigrama (simaurra kenduta)

2011-06-05T20:32:00.001+02:00

Gure Teknopatak zientzia fikziozko (bere zentzurik zabalenean, Buffy eta "Embrujadas" agertzen baitira) telesailen flowchart edo organigrama aurkeztu zigun berriki bere blogean. Ideia ona, gaur egungo eskasia telesail zaharrak ikusiz gainditzeko aukera ematen baitigu, garai hobeak iritsi bitartean.

Zoritxarrez aipatu organigrama simaur pilaz beteta dago (zer egiten dute hor "Angel", "xena" edo "Pokemon" ??????). Sail horiek Zi-Fikzioaren barnean sartzea iraina da eta irainak brotxarekin ederki konpontzen dira Gimp erabili ezkero. Eta mesedez, ez gehiago esan Lost/Perdidos zientzia fikzioa dela. Norbaitek hori esaten duen bakoitzean Darth Vaderrek Ewok maitagarri bat akatzen baitu.

Portzierto, ditxosozko flowtxart horretan "Defying Gravity" (une honetan ikusten ari naizena -> laster analisia) falta da, bai eta Steven Spielberg-en hurrengo bonbazoa/fail-a Falling Skies.

Iturria: Teknopataren Txokoa.

LITSABBUR by IKEA

2011-05-29T21:25:00.001+02:00

Jedi dendatik iritsi zaizun laser-ezpata berri berria nola erabili ez dakizula bazabiltza eta Yoda-ren txapa jasateko behar den pazientzia falta bazaizu, hemen duzu Ikea-ren Litsabbur baten instrukzioak. 15 minututan prest egongo zara Inperioa menderatzeko.

Eta ondoren garaipena Ewoken haragi-bolak janez ospatzera.

Hau eta irudi gehiago Pixfans eta College Humor-en.

Space, Above and Beyond

2011-05-25T22:59:00.002+02:00

Denbora luzea neraman fundamentuzko zientzia fikziozko telesaila ikusi gabe. Bai, Mas Allá del Límite ikusi izan dut noizbehinka, Star Trek Voyager ere tarteka, baina engantxatu gabe. Egoera ez da aldatu baina baliteke aldatzea, izan ere Space, Above and Beyond (ber)ikusten hasi naiz.

ETB1en eman zuten telesaila, gazteek ETB1 ikusten genuen garai urrunetan. Erakargarria zen oso, euskaraz zelako alde batetik, efektuak oso onak zirelako (1995. urteko saio batentzako) eta Star Trek-en estetikatik aldentzen zelako. Bai, zentzu horretan 2003. urteko Galactica-ren aitzindaria izan zela esan genezake, pertsonai ilun eta argumentu orokor landuarekin. Hau da, berritzailea oso.

Nik ikaragarri maite nuen telesaila, baina gainontzeko gizakiek ez antza eta lehenengo denboraldiarekin batera bukatu zuten saioa. Zientzia fikziozko telesailen gaur egungo eskasia honetan pena merezi lezake Karta Eroei bigarren aukera bat ematea.

Friki-harrotasun egun luze eta oparoa izan dezazuela \\//

gif nobentero hipnotizatzailea

2011-05-25T22:15:00.000+02:00

Irudi honek zer duen? Ba ez dakit. Super Mario, Gremlinak, Duke Nukemeko neska majoak... Ez dakit. Akaso usoaren mugimendu magnetizantea edo atzeko planoko kolore estroboskopikoak, baina gauza da zeharo liluratuta naukala gif honek.

Berandu izanen da akaso, baina minutu erdiz begiratu ezkero betirako kalte neurologikoa sufritu dezakezuela abisatzen dut. Dena den okerragoa izan daiteke politikarien egunotako alukeri-jasa aguantatzea. Dudik ez.

geekzodiakoa

2011-05-16T08:08:00.000+02:00

Badakizue hemen zodiako, homeoterapia, wifi-aren aurkako mugimendu eta Jedi erlijioaren zeharo aldekoak garela baina ez. Edozein modutan gaurkoan sineskeria zikin guzti horiek gure frikizio sanoarekin uztartuko ditugu, zodiako txinatarraren antzeko ondorengo geekzodiakoan:

Ni antza "undead" bat naiz (1916. urtean jaioa). Molatzen du bai, zonbien asuntoa gustatzen zait, baina Drakula bat jarri beharrean zonbi begibakar eta ustel bat jarri zezaketen! Drakula horrek Bratz batek baino beldur gutxiago ematen du eta!

Iturria: the Whoa!

hezur-haragizko Oliver eta Benji (made in japan, noski)

2011-05-06T00:33:00.003+02:00

Sekulako frikizioa gaurkoa, ekialde erradiaktibo urrun horretatik soilik iritsi daitekeena. Japoniar batzuk Oliver eta Benji, futbol zelai kurbatua zeharkatzeko berrogei minututako saio osoa behar zuten marrazki bizidunen sarreraren bertsioa egin dute. Eta zinez urrezko eserlekua irabazi dutela frikien zeruan, Mazinger eta Gatchamanen ondoan.

Uste duzue posible litzatekeela hemen Euskal Herrian(TM) unetxo batez futbola, mendia, bertsoak eta politika alde batera utzi eta horrelako gauzaren bat egitea?

Iturria: Ubuntu Life.

izan behar zukeen The Return of the Jedi

2011-05-02T08:21:00.000+02:00

Darth Vader Tarantinoren eskuetan erori izan balitz gauzak oso bestelakoak ziratekeen, baina nonbait burua ideiez gainezka duen (erremasterizazioa, 2. trilogia, 3D...) gure Lucas-ek ez zion elkarrizketa mamitsurik eman nahi izan gure aita maitagarriari. Hau konpontzeko ondorengo erremakea prestatu du nire mirespen osoa merezi duen norbaitek eta egitan eszena asko hobetu dela. Ikusi bestela:

Orain, askok pentsatuko du bere barnerako Jar Jar Bins gorrotagarriaren pertsonaia konpontzeko gai izango ote diren, Wazemankeko ahotsekin edo. Zoritxarrez horrek duen konponbide bakarra ordenagailu bidezko ezabaketa osoa da. Babes-kopiak eta guzti.

Duke Nukem + Megadeth = Atomikoa

2011-04-14T22:38:00.004+02:00

Asteleheneko sarreratik tematu samar ibili naiz Duke Nukem eta urrezko garaiko FPS-ekin, egia esango badizuet. Dokumentalak ikusi ditut (ba al zenekiten Half Life garatu zuen Valve Micro$oft-eko batzuk sortu zutela eta hasiera batean Quakeren motorea erabili behar zuela?), Duke Nukem 3D netbookean instalatu dut, Ubuntu pean, eta hori gutxi ez balitz Dukearekin amets hezeak izan ditudala uste dut (odolagatik diot, ez pentsa...).

Aurrekoa kontutan hartua astea Duke Nukem 3D bideojokoaren musikarekin bukatzea pentsatu dut. Duke Nukem 3D-ko musika handia da, ezinbestean, baina eskalatik atera egiten da..........Megadeth-ek eginten badu. Igo bolumena eta hasi burua astintzen!

igo bolumena eta gozatu!

Asteburu ona izan dezazuela eta badakizue, "Pig-cop" guztiak txikitu!

Warp5 dokumentalak: FPS bideojokoen hastapenak

2011-04-11T22:06:00.000+02:00

Dinosauroen eta intsektu erraldoien garaietan paregabeko izaki kementsuak bizi izan ziren, Olimpo eta Valhallatik etorriak. Ileak aurpegia estalita eta teklatu zaratatsua eskuan hartuta erresoluzio negatiboko monitore batzuen aurrean makurtzen ziren, inoiz giza espezieko eme batek ikusitako gela ilun, heze eta kirastunetan euren bizi-zikloa betez. Izaki misteriotsu bezain zoragarri hauen lanen historia da hau:

id Software & Wolfenstein

Duke Nukem & Build Engine

Aukera hau probestu nahi nuke institutuko orientatzaileari gizaki bati gerta dakizkiokeen zorigaizto eta sufrimendu handienak opatzeko. Mila esker nire informatikarako jakin mina erreprimitu eta biologiaren munduko miserietara atea irekitzeagatik.

Trexelak

2011-04-09T21:44:00.001+02:00

Trexels Star Trek-eko pertsonai ia guztien poster bat da, 8-bit itxura retroaz eginak. Zer gehiago eska daiteke? Ba eskatzearren Enterprise eta gainontzeko espazio ontzi guztiak eskatuko nituzke, baina oraingoz liluratu nauten Trexels hauei begira emango ditut hurrengo 72 orduak edo. Zuen baimenarekin, noski.

Engage!

Iturriak: Microsiervos-en ikusia eta Trexels webgunea.

Power Rangers hiperultramegacrossoverra!

2011-04-04T22:23:00.002+02:00

Hauxe da, lagunok, sekula ikusiko duzuen gudarik epikoena. Ez Eskuargi Berderik, ez Thor, ez Amerika Kapitaina, ez Orreaga. Ez, megakrosoverrik handiena sekula esistitu izan diren Power Ranger guztiak batera borrokatzen duten hauxe da. Hau ikusi eta gero, lagunok, mundua ez da gauza bera izango.

Portzierto, esan beharra dut ni Power Ranger-zale baino Jet-Man zalea naizela. Izan ere, zer da Power Ranger bat baino hobea? Horixe, euskaraz aritzen den Jet-Man euskalakaria :)

Eta zuek, zein Power Ranger -JetMan zenuten gogokoen?

Iturria: Unreality.

Duke Nukem beeeti berandu ¬.¬

2011-04-03T22:47:00.000+02:00

Ni bezala, Duke Nukem beti dabil berandu (bere kasuan 14 urte inguru berandu, nirean, neurtzeke dago oraindik). Oraingo honetan hilabete bat besterik ez da atzeratu garapen denbora luzeena izan duen bideojoko honen plazaratzea, baina txantxa bat egitearren Gearbox Softwarrekoek bideo grazioso hau zintzilikatu dute:

Inork esan ez diguna, ordea, atzerapen horren arrazoia izan da. Warp Bortz-eko Ikerketa Bulego hipersekretuak, indarkeria basatia erabiliz, honako bideoa lortu du, denek izkutatu nahi izan digutena argitara ekarriz. Aluzinatu:

Iturriak: Gea Geek, Games Ajare.

Painten erritmora

2011-03-18T15:19:00.002+01:00

Ez dakit nori bururatuko zitzaion ondoko frikikeria, baina fijo txikitan Basik-eko eskulibirua oso osorik irakurri zuela, bere adineko haurrek futbolean aritzen ziren bitartean. Tira, ba nolabait (azalpena Despues de Google blogan duzue) lagunik gabeko morroi honek Paint.exe programa hartu eta musika bihurtu du. Eta harrigarria badirudi ere, pixka bat editatu ondoren, musika oso dantzagarria atera zaio (non dantza = burua alde batetik bestera mugitu).

Paint.exe by fisco130

Agian Micro$oft-ekoek sistema eragileak egiteari utzi eta musika egiten hasi beharko lukete.

Iturria: ddg

Futurama NES style

2011-03-17T22:14:00.000+01:00

Ni bezala Benderren filosofiaren jarraitzaile zintzoa (oximoron mode = ON) bazara eta NES zaharrarekin (edo NASA hiperbitaminatuarekin) igarotako orduak oroitzean malkotxo bat isurtzen bazaizu, ondorengo bideoa gustatuko zaizu halabeharrez. Futurama + 8 bit = frikizio maitagarria. Always.

Eta gustatu ez bazaizu, musukatu nire ipurdi metaliko disdiratsua, babua!

Jatorria: Futurama.

Enterprise bat diskete batekin nola egin

2011-03-10T19:33:00.002+01:00

Noizean behin, denbora laburrez bada ere, hatzak teklatutik altxatu behar dira tendoiek euren luzera normala berreskuratu ahal dezaten. Horrelako une eskasak sekulako Enterprise bat egiteko probestu ditzazkegu, kajoiaren atzealdean ahaztua dugun diskete zahar hura erabiliz. Has gaitezen bada:

polita atera zait, ezta?

1) Disketea ireki baino lehen aprobetxatu ordenagailuan sartu eta barruan zer dagoen ikusteko. Zorte pixka batekin ikasle garaiko bularraldea erakusten duen neska horren argazkia eta eSheep screen mate-a izango dituzu oraindik. Bikain!

2) Orain bai, disketea ireki. Badakizu nola egiten den, jakin-min suntsitzaile hori asetzeko mila aldiz egin duzu eta.

3) Metalezko zatiak atera. Lehenengo metalezko atetxoa, hainbat aldiz alde batera mugituz irekiko zenuena, barruko diskoa ikusi eta malgukiari esker bere kabuz nola isten zen ikusteko. Ondoren diskoaren erdian dagoen metalezko pieza borobila ere atera.

3) Metalezko atetxoarekin gorputza (stardrive section-a) eta nazelak egingo ditugu eta pieza borobilarekin paterra, edo teknikoki saucer section bezala ezagutzen dena. Azaltzeaz nekatu naizenez, hemen duzu bideoa:

Ale ba, animo eta zuen Enterprise-en argazkiak espero ditut.

Iturria: wikiHow, asciipr0n.

film zaletasuna neurtzeko jokoa

2011-03-09T21:47:00.000+01:00

Neurtu ezazu filmeei zenbat dakizun Doraemonen poltsikotik bertatik ateratako gailu miragarri, zoragarri eta hiperteknologiko honekin. Film bakoitzeko (frikiak gehienak) irudi bat aurkeztuko zaizu eta zuk, urkatuan bezala, hizkiak asmatuz joan behar duzu filma asmatu arte.

Adibide gisa nik lehenengo bederatziak asmatu ditut, gero afaltzera joan eta itzulitakoan kale egin dut guztietan. Ondorioa, Gremliei ezi zaiela afaririk eman hamabiak eta gero, eta niri bederatzietatik aurrera, izaki guztiz ergel batean bilakatzen bainaiz (bai, posiblea da).

Iturria: Punto Geek.

esnatzeko modurik onena

2011-03-08T20:57:00.000+01:00

Honelaxe esnatzen ziren gaur ~~Enterpriseko Spock eta bere lagunak~~ Discovery transbordadoreko astronautak gaur goizean. William Shatner-en ahotsarekin, Star Trek jatorrizko telesaileko sarrera hura moldatuz. Esnatzeko modu ederra ezta?

Nik, hasteko, sakelekoan jarriko dut, Kirk kapitainaren ahots belusatuak nire esnatzeak goxoki laztandu ditzan goizero. Ains [hasperena]!

Iturria: Denek dute honen berri, ze demontre!

Чалф Лифе еррусиарра

2011-03-04T18:37:00.000+01:00

Ez dakit ba. Freeman errusiarra balitz palankaren ordez polonioa erabiliko luke. Zikinagoa eta krudelagoa, bai, baina eraginkortasunean parekorik ez duena. Enpin, konbineak zein zonbiak amen batean garbituko lituzkeela.

Iturria: Games Ajare.

Zuberoa-Tatooine connection

2011-03-03T22:33:00.000+01:00

Zuberoako edozein herri irudituko luke botepronton, baina desadostasunak nola konpontzen dituzten ikusita Tatooine edo dela esango nuke, zuberotarren makilek ahalmen sekretuak ez badute behintzat. Horrek azalduko luke agian makilekin oholtzan jotzen ibiltzeko duten afizio bitxi hori.

Iturria: Punto Geek.

Aparteko Jaunen Elkartea

2011-02-23T22:40:00.002+01:00

Twitterren bidez @ileturia -k "League of Extraordinary Gentelmen" komiki retro-frikiaren berri ematen zigun gure pozerako eta, egia esanda, azal horri zeozer falta zitzaion. Atrebentzia barkatuko didazue baina mus partida epiko horrekin ausartu nintzen bezala, "League of Extraordinary Gentelmen" horren azalari falta zitzaiona gehitu diot. Ni neu!

Portzieto, nor da ipurdia ukitzen ari didan morroska hau?

Toccata eta Fuga 5½ eta 3½ hazbete bertsioan

2011-02-18T18:09:00.009+01:00

Eta lan astea bukatzeko musika pixka bat, oraingo onetan disketeekin egina. Eta ez edonolako flopiak gainera, fijatu bestela 5½ hazbeteko diskete puska horietan. Aaahhhhhgggg!

Floppies are back, baby!

Iturria: Paraiso Friki.

Mars500 misioa Martera iritsi da

2011-02-16T20:11:00.000+01:00

Ekainean abiatu ziren sei kosmonautak historiako lehenengo Marterako bidaia luzean eta arazorik gabeko larunbateko lur hartzearen ondoren hamar egun emango dituzte Marten hainbat esperimentu egiten.

Historiako lehenengo ibilaldia Marten

Laster mezu arraroak jasotzen hasiko dira eta horrekin batera arazo psikiatrikoak sortuko zaizkio tripulazioari. Azkenean dena dimentsio arteko bidaiak ikertzean askatutako munstro-deabru batek sortua dela jakingo da baina ordurako denak hilda egongo dira. Enpin, Marten gertatu ohi diren gauzak.

Portzierto, deabruzko munstroarena eta baita Marteko misioarena ere gezurra zikina dira biak. Izan ere Mars500 misioa simulazio bat besterik ez da, etorkizunean egin daitekeen benetako misio batentzako prestaketa edo. Ze gauzak.

Iturria: The Website @ the End of the Universe, Mars500 Youtubeko katea, ESAko webgunea.

superheroi gazte & alferrak

2011-02-14T21:12:00.000+01:00

Heroiak telesaila pantailaratu zutenean lerdea irten zitzaigun ahotik listu guruinak idortu arte. Ondoren, telesailak aurrera joan ahala, babu aurpegiak jarri zitzaizkigun superheroi horiekin zer egin ez zekitela ikusita. Zorionez ideiaz betetako gazteak daude munduan (ez niri begiratu, gazteria dagoeneko pasa baitzitzaidan eta ideiak inoiz ez baitira nirekin izan) hau bezalako altxorrak sortzeko gai direnak:

Noski, gauza bat da laburmetraia ekoiztea eta oso bestelakoa hamapiko atalez osatutako denboraldia egitea (zer esanik ez denboraldi gehiago badira). Baina tira, bideoak itxura ona duenik ezin uka daiteke.

Non ikusia: Topless Robot.

Axe Cop & Dinosaur Soldier...

2011-02-10T20:43:00.000+01:00

... sekula izan diren superheroi bortitzenak dira (beti ere Dukearen baimenarekin, noski):

Eta? Zer iruditzen zaizkizu orain leotardo koloretsuak daramatzaten Marvel edo DCko heroi moñoño horiek?

Iturria: Topless Robot.

zonbiek ere maitatezen dute

2011-02-09T22:25:00.000+01:00

Bizidunok munstro nazkagarri, kirasdun eta ustelak bezala ikusten ditugun arren (finean horixe direlako), zonbiek ere maitatzen dute (garun freskoez aparte, esan nahi dut). Zinez.

Baina hau Bell Air-eko printzeak aspalditik zekien, "I am Legend" filmeko hautazko amaieran baieztatu ahal izan zuen bezala:

Europa

2011-01-30T17:44:00.002+01:00

"MUNDU GUZTI HAUEK ZUENAK DIRA, EUROPA IZAN EZIK. EZ SAIATU HAN LUR HARTZEN."

Irudia: APOD.

Wolfenstein 1D

2011-01-26T21:30:00.000+01:00

Artelana da gaur dakarkizuedan hau, lagunok. Hartzazue Wolfenstein 3D, pare bat dimentsio kendu eta hauxe da ateratzen dena. Jokagarritasun eskaseko Wolfenstein 3D joko epikoaren bertsio lineala. Ikeagarriya.

klikatu irudian jolasteko (potrorik baduzu)

Iturria: Vida Extra, Wolfenstein 1D webgunea.

Gehigarria: Twitterren @lostintv -ren bitartez jakin berri dut Wolfenstein 3D-ra nabigatzailean jokatu daitekeela hemen. Gaurtik aurrera kosmosa pixkat hobea da.

warp5 gomendioak #1: ohe azpian begiratu

2011-01-25T21:42:00.000+01:00

"Zure aire girotua izorratzen bada edo ikuzgailuak eztanda egiten badu edo bideo-gailuak funtzionatzeari uzten badio, teknikoari hots egin baino lehen argi guztiak piztu, kaxoi eta armairu guztiak aztertu eta ohe azpian begiratu, izan ere batek daki, Gremlin bat izan zenezake etxean"

Randall Peltzer, asmatzailea (eta Gremlin zaintzaile frustratua)

Robotikaren 3 legeak

2011-01-24T23:04:00.000+01:00

1. Robot batek ez dio gizaki bati kalterik egingo ez eta ekintza faltagatik gizaki bat kaltetua izaten utziko.

2. Robot batek gizakiek emandako aginduak bete behar ditu, aginduok Lehenengo Legea urratzen ez duten bitartean.

3. Robot batek bere izatea babestu behar du, Lehenengo edo Bigarren Legeekin gatazka sortzen denean izan ezik.

Caution, zombies ahead!

2011-01-11T23:16:00.000+01:00

Gaur egungo zonbiz betetako mundu postapokaliptiko honetan garrantzi handikoa da prebentzioa. Ez, ez naiz zonbiekin larrua jotzean kondoia erabiltzeaz ari, noski. Horrek agian HIESa harrapatzetik babestuko zintuzke, baina alde batetik ez dakigu zonbiek HIESa izan dezaketen eta bestetik izan balezakete ere HIESa harrapatu ez baina zonbi izango zinateke zu ere handik gutxira. Tira, zonbien sexu gaixotasunei buruzko gogoeta interesgarri hau alde batera utzita, hemen dituzue Zonbie Place-k plazaratutako zonbien seinale batzuk. Gainontzekoak Zonbie Place-n.

Ongi izan eta kontuz hildako ibiltariekin.

garai txarrak Cylon-entzako

2011-01-07T10:15:00.001+01:00

Cylona etorkizun handiko roboten gizarte bat izan zen. Hotzak, adimentsuak, gupidagabeak, gizakien gizarte ustel, akasdun eta emozionalki ezegonkorraren ondoan. Zorigaiztoko une batean baina jainkoaren ~~ideia~~ virusa sartu (Bell Air-eko printzeak aifon bat sartuta akaso) eta haienak egi zuen. Gizakiekin maitemintzea infekzioaren lehenengo zantzua besterik ez zen izan eta ondokoa galaxia menderatu ahal izan zuen gizarte handi horren azkena.

So say we all.

Noren meritua: Botropolis.

Daft Punk-eko kaskoen eboluzioa

2011-01-07T09:41:00.003+01:00

Kilikiena falta da, baina tira.

Lotura: i.Wheee.es

Enterprise-aren Pantailazo Urdina

2011-01-03T17:04:00.004+01:00

- Kirk kapitaina, bidean topatu dugun nebulosako magnetrino molekulek ezusteko eragina izan dute Enterprise-aren txip isolinearetan...

- Logika jarraituta, Ctr+Alt+Del sakatzea gomendatuko nuke jauna \\//

- Horrek ez du zentzurik Spock, batzuetan bihotzak dioenari jarraitu behar zaio. Ukabilekin konpondu beharreko arazoa da hau!

- Bai, Kirk kapitaina ¬.¬

Non ikusiya: Paul Gazis.

... eta Star Wars pixelatuak ere bai

2011-01-02T22:46:00.000+01:00

Ez al dizue 8bit-etako Darth Vader hau besarkatzeko gogoak ematen?

Inspirazioaren iturria: No soy tu princesa Peach.

Mamu Harrapari pixelatutak

2011-01-02T22:34:00.002+01:00

8bit-etako dimentsiotik zuzen zuzenean etorriak:

Aaaai, zeinen maitagarriak!

Non ikusia: No Soy tu Princesa Peach.

Gizona itzuli da (eta malaostia handiarekin, gainera)

2010-12-30T15:11:00.000+01:00

Dukeak estiloa dauka. Bera da estiloa, bera da klasea. Eta Dukea itzultzear dago. Nahiz eta itzultzeko denbora luzea behar. Eta bide luzean ez dago ezer ikuskizun on bat baino, potroak ukitzen dizkioten arte, noski. Gizona itzuli da, baby!

Nori (inongo lotsarik gabe) kopiatuta: Gamesajare, The Duke - Fate of Humanity feisbuken.

Gabonetarako zonbi-gomendioak

2010-12-26T19:53:00.001+01:00

Zonbi apokalipsiaren garai hauetan ere Gabonak bake eta zorion aroa izan daitezke gomendio xume hauei jaramon eginez gero:

Badakizu, zonbiak elkarrekin hiltzen dituen familia, batua dirauen familia bat da.

Iturria: Queremos Hacer la Primera Pelicula de Zombis de Euskadi Facebooken.

hemen da gabonetako zozketa !

2010-12-19T16:24:00.004+01:00

Bai lagunok, Robolentzero Warp Bortzen kuarteletan izan da urteroko mantendua eta eguneraketak egiteko, eta ohi duen bezala oparitxo bat utzi digu Warp Bortz Mugimenduko kamaraden artean zozketatzeko. Aurtengoan gainera opari bereziki low-tech bat utzi digu: Bi pantailatako Nintendo DS baten antza duen NE-Double Games kontsola eramangarri ~~aparta~~!

Erresoluzio oso baxua, freskatze frekuentzia penagarria, jokagarritasun eskasa eta erretina erreko dizun retroiluminazio urdin erradiaktiboa. Eta guzti hau gutxi balitz, gorreria aurreratuko dizuten entzungailuak eta ezertarako balio ez duen uhala.

Aprobetxa ezazu aukera eta esaiguzu NE-Double Games kontsola penagarri hau nahi duzula blogan iruzkina idatziz zein Twiterren bidez. Zozketa urte bukaera baino lehen egingo dugu eta denbora gutxian saridunak etxean jasoko du, berarentzako inongo kosturik gabe, noski. Hau pagotxa!

Derezzed

2010-12-17T08:01:00.000+01:00

Gaurko beste sarrera bat pentsatua neukan, baina Daft Punk-ek Tron Legacy-rako eginiko Derezzed entzun / bideoa ikus eta liluratuta geratu naiz. Eta noski, egoera katatoniko honetan ezin idatzi. Asike, asteburu ona izan eta gozatu burutik atera ezin ditudan txiptune 2.0 hauetaz:

End of line.

Super Mafia Bros.

2010-12-16T20:59:00.000+01:00

Super Mario Bros. Nintendorako atera beharrean Pleiesteision 3rako egingo balitz definizio ikeagarri handiagoa, mapa handiagoak, gordintasun handiagoa eta errealismo handiagoa izango lituzke. Baita aspergarritasun handiagoa ere. Pues hori:

Nondik lapurtuta: Paraiso Friki.

wikileaks-i buruzko egia primiziyan

2010-12-14T19:24:00.000+01:00

Honezkero badakigu denek gorroto dutela Wikileaks, baina ez dakiguna da gure Julenek sekretu guzti horiek nola lortu dituen. Utzi Wikileaks Euskal Herrian albo batera zeren gaurko honetan, primizia kosmikoan, WarpBortz-Leaks-i esker Wikileaksen modus operandia jakitera emango bait dugu. Eta modurik eraginkorrenean gainera, ezer irakurri beharrik gabe:

Nondik kopiatua: Games Ajare.

Denek gorroto dute Wikileaks

2010-12-09T21:20:00.000+01:00

Eta orain baita Batmanek ere.

Kontuz Wikileaks, AEBak ez dira zuretzat arerio izango, baina batmanen malaostia epikoa da!

Iturria: Geek Territory.

ispilu unibertsoa da gurea

2010-12-08T11:18:00.003+01:00

Alderantzizko mundu honetan, non espekulazioak eragindako krisiaren irteera liberalismo bortitza den, non Euskadi izeneko autonomia erkidegoko lehendakariak euskaraz ez dakien, non nafar izaeraren aldarria burgostar batek eraman nahian dabilen, ondoko irudia ez litzaiguke arraroa iruditu beharko.

Hau mundu erreala da, gurea aldiz ispilu unibertsoa

Gure alderantzizko mundu honetan KITT-en ordez kotxea iPhone batek kontrolatuko luke eta Devon-en ordez Jobs Deunak erabakiko luke nor salbatu eta nor ez , kutxatik pasatu ezkero, noski.

Iturria: No Soy tu Princesa Peach.

Ilargiko nazien itzulera

2010-12-02T19:16:00.001+01:00

Apirila partean Iron Sky filmaren teaserra ekarri genizuen Warp Bortzera. Badakizue, ilargiaren bestaldean ezkutatutako nazien itzulerari buruzko film moderno moderno hori (moderno diot jakitera emateko eta finantzatzeko moduari dagokionez, crowd funding edo deitzen dena).

oso retro-futurista, ezta?

Orain dela aste pare bat edo hasi ziren grabaketa lanetan, baina ez nator horren berri ematera (horretarako webgune ofiziala, feisbuka eta tuiterra duzue), baizik eta bigarren teaserra, edo trailerra, edo bideoa, edo dena delakoa zuekin partekatzera. Izan ere ikusi eta guztiz awesomizatuta utzi nau. Hori edo epilepsia krisi bat izan dudala. Ia zuei zer iruditzen zaizuen eta nahi baduzue komentatu. Edo nahi ez baduzue, ba ez komentatu.

Fobos eta Fobos

2010-12-01T19:37:00.000+01:00

Fobos, NASAko inozoen arabera:

Eta Fobos, benetako amesgaiztoa:

Zientzialari ezjakinak!

Linux kernela entzun nahi?

2010-11-30T22:31:00.001+01:00

Eta hau da gauza frikietan frikienetarikoa, frikitasuna bere egoera garatuenean (edo degeneratuenean agian). Inongo erabilgarritasunik ez duen irratia. Entzuteko ere desatsegina dena. Azkenengo Linux kernel egonkorra irratiz irakurrita. Ahots sintetizagailu bat erabiliz, gainera, edukiarekin nahikoa ez balute bezala. Ezetz bug-en bat topatu!

klikatu irudian Linux.fm webgunean irratia entzuteko

Portzierto, aproba egin ezazue hainbat leiho irekiz eta animatzen bazarete kontatu albo-ondorioak nolakoak izan diren.

Non ikusia: Maldito Friki.

Mr. Burns x Steve Jobs. BA-TE-RA-KE-TA!

2010-11-25T21:49:00.001+01:00

Steve Burns edo Montgomery Jobs, berdin da. Biak dira negozioen jeinuak, biek ematen diote jendeari nahi dutena. Batek elektraindarra, elite sozial baten parte izatearen sentsazioa besteak. Ukitzen duten guztia diru bihurtzeko gai eta unibertsoa menderatzeko anbiziodun. Ah! Eta biluzik ikusi nahiko zenukeen azkenengo gauza kosmos osoan. Ala ez?

Non ikusia: i.Wheee.es

Alf-en zorigaiztoko amaiera

2010-11-24T23:04:00.002+01:00

Telebista kate batean Alf, estralurtar zital hori, telesaila ematen ari direla ikustean behin lagun batek kontatu zidana etorri zait burura. Lagun horrek miragarriki Alf telesailaren azkeneko atala oroitzen zuen. Gauza bitxia, ze hain argumentu eskaseko telesailak (adi, honekin ez dut esan nahi txarra zenik, aitzitik, izugarri maite nituen Alfen barrabaskeriak) bukaera izan zezakeenik ez nuen espero. Nonbait telesaila bukle baten antzekoa izango zela espero nuen, etengabe betirako errepikatuko zena, ausazko ordenean askotan (Simpsonekin gertatzen den bezala, adibidez).

honek ez du sarrerarekin inongo zerikusirik, baina gustatu eintzait ;)

Ba lagunak oroitzen zuen azkenengo kapitulu horren laburpena honelakoa izango litzateke: Nolabait Alf bere espezie berekoekin jartzen da harremanetan, telefonoz akaso, eta beraiekin joatea erabakitzen du. Estralurtarren zain zegoenean hara non Estralurtarrak Harrapatzeaz Arduratzen den AEBetako Atal Supersekretua (E.H.A.A.A.S) agertu eta atxilotu egiten dute. Kitto. Eta ordutik aurrera atal hau ikusi zuten haur guztiak traumatizatuta bizi izan ziren betirako.

egin klik irudian bideoa Youtuben ikusteko

Ondo lo egin haurtxook.

Wier Sind Der 8-bit Roboter

2010-11-19T08:15:00.000+01:00

Orain dela aste pare bat jarri genuen "Human after all", Daft Punk taldearen musika bideoaren harira, Superandonik, jakituria handiz, Kraftwerken "We are the Robots" handia gomendatzen zigun. Eta hara non, blogan jartzeko gauzen zerrenda amaigabe horretan, abestiaren 8 bitetako bertsioa topatu dudan, paleoblogia pixka bat eginez. Jatorrizkoa ona bada, imajina ezazue 8 bitetako bertsioa. Robodantzara!

Milesker Superandoni :)

Iturriak: i.Wheee.es, 8-Bit Operators.

japoniarkeriak (2): Ninendo DS+hatz robotikoa+katana

2010-11-18T23:10:00.000+01:00

Barkatuko didazue japoniarren bideo hauekin astuna jartzen banaiz, baina awesomitate japoniar hau topatu dut aurreko sarrera plazaratu eta gutxira. Morroiak erakusten duen sinkronizazioak meritua merezi du bai, baina benetan nire mirespen osoa merezi duena gauza hauetan denbora galtzea da. Zorionak, sensei!

Non ikusia: Pixfans.

japoniarkeriak

2010-11-18T22:33:00.001+01:00

Japoniarrak frikikerietan ari diren beste bideo batekin natorkizue gaur. Egunen batean japoniarren bideo aspergarri bat jarri beharko nuke, ez dakit, ekonomia edo eguraldiari buruz ari direneko bat bat adibidez, baina orduan seguruenik hodeiek begiak eta irribarre zabal bat izango lukete. Oraingo honetan Super Mariorekin animatu dira, nola ez. Bideoa ez da berria, baina bai nahikoa dibertigarria. Txapeldun hutsak dira gauza arraroak egiten, haisue!

Non ikusia: Paraíso Friki.

Bill Gates Doom-en

2010-11-17T22:30:00.000+01:00

Astearen erdia gainditu dugula ospatzeko inongo graziarik ez duen Bill Gates bat dakarkizuet, Windowsen urrezko garaiaren hastapenetakoa (Windows 95-aren promoziorako bideoa da hain zuzen ere). Gatesen grazia falta ez da inongo berria, bai ordea bere speech-a Doomeko protagonistaz mozorrotuta eta Doomen barruan sartuta ematearena. Doomeko morroiek akatu izan balu te sikiera!

Iturria: Abadía Digital.

Futurama Kirk Zapp Branniganen ikuspegitik

2010-11-16T23:17:00.001+01:00

Bideoa berria ez bada ere, berriki Bender's Big Score ikusi eta gero (portzierto, nahiko kaskarra iruditu zitzaidana) etorri zitzaidan gogora. Hori edo izpi kosmiko batek txiripaz sinapsi bat jotzean aktibatutako oroimena. Tira, bideoa Futuramako pertsonaien aurkezpena da, Zapp Brannigan, kapitain lerden horren ikuspegitik. Eta galaxian kontutan hartu beharreko iritzi bat badago, hori ~~Kirkena~~ Branniganena da.

Iturria: Zona Fandom.

Back <--- to the Future filmaren denbora-lerroa

2010-11-14T19:01:00.000+01:00

Back <--- to the Future (Regreso <--- al Futuro) filma fisikaren maisulana da denok dakigunez, denbora paradoxak, unibertso alternatiboak eta denbora-lerro adarkatuak Fansworth doktoreak berak egingo lukeena baino era samurragoan landuz. Ikono honen sakontasuna bere handitasun osoan atzemateko, beraz, ezinbestekoa izango zaigu ondoko grafikoa, trilogiaren denbora-lerro ez linealen konplexutasuna gure garun bidimentsionalera moldatzen duena.

Ordu erdia grafikoari begira badaramazue ezer gutxi ulertu ezinik (ni bezala), pena merezi du azalpena irakurtzea. Edo hobe pentsatuta, ez. Itxi fitxa ta segi gauza entretenigarriagoak egitera.

Iturria: Cinemassacre, Futurepedia.

Night of the Living Trekkies \\//

2010-11-10T23:21:00.000+01:00

Zonbien aroan bizi garela dudarik ez dago. Zonbiei buruzko komikiak, telesailak aurki ditzazkegu nonahi. Donostiako kaleetan ere garun pintxoak jaten izan ditugu zonbiak berriki. Zonbiak modan daude, hori ezin uka. Baina lagunok, badago zonbiak baino gauza hobeagorik: Zonbi Trekkiak!

Zoritxarrez liburu baten iragarkia da (adi haurrok, liburuak oso dibertigarriak dira!), eta ez film batena. Baina lasai, ez da luze izango zonbiak eta Star Trek unibertsoa batzen dituen film indi baten proiektua agertu arte. Apostu egin nahi?

Portzierto, hauxe izan daiteke zuen blogari gaixo honi egin diezaiokezuen Gabonetako oparitxoa. Total, hamar mixerable dolar besterik ez dira ¬.¬

Iturria: GeekStir.

Paciencia Lewis, somos humanos (|-[

2010-11-09T09:38:00.001+01:00

Robocop 2 nire zientzia fikziozko film kuttunenen artean badago ez da originalagatik (horretarako Robocop 1 dugu) ezta efektuengatik ere (stop motion efektu horiek aurrekoan ikusiak genituen jada). Aitzitik, Robocop 2 umorez betetako filma izateagatik dut hain gustuko. Minbizia sortzen duen eguzkitarako kremaren iragarkia edo bere buruko (literalki) torlojua askatzen duen bitartean "...paciencia Lewis, somos humanos" dioen Robocop hura ditugu film honen umorearen bi adibide. Agian arrazoi horregatik suertatzen zaizkit hain dibertigarriak gure Mundu Errealeko™ zenbait pertsonaien esaldiak.